Pritet marrëveshje për punësim sezonal në Maltë

Ministri i Punës dhe Mirëqenies Sociale, Skender Reçica po qëndron në një vizitë zyrtare në shtetin e Maltës, me ftesë të ministrit të Familjes, të Drejtave të Fëmijëve dhe Solidaritetit Social, Michael Falzon.

Përmes një komunikate për media bëhet e ditur se në kuadër të kësaj vizite Reçica sot është takuar dhe me ministrin e Edukimit dhe të Punës, Evarist Bartolo me të cilin kanë biseduar rreth mundësive të bashkëpunimit në fushën e punësimit dhe edukimit profesional.

“Reçica dhe Bartolo u dakorduan për bashkëpunim dhe shkëmbim përvojash në këto dy fusha. Gjithashtu, gjatë takimit, të dy ministrat u dakorduan që të nënshkruhet një marrëveshje bashkëpunimi në fushën e punësimit dhe angazhimit sezonal të punëtorëve, respektivisht qytetarëve të Republikës së Kosovës në shtetin e Maltës, shtet ky i Bashkimit Evropian”, thuhet në komunikatë.

Reçica dhe Bartolo u pajtuan që të intensifikohet puna e grupeve punuese, në mënyrë që kjo marrëveshje të finalizohet sa më parë, me qëllim që të nënshkruhet në një të ardhme të afërt dhe të fillojë implementimi i saj në praktikë. Ai e ftoi ministrin maltez për vizitë zyrtare në Prishtinë, për të nënshkruar marrëveshjen pas finalizimit nga grupet punuese të të dyja shteteve.

Shpërndaje

Leave a Comment

Your email address will not be published.