Presioni ndërkombëtar e largon nga Akademia Ushtarake kriminelin serb që vrau shqiptarët

Ish i dënuari për krime lufte në Kosovë, Vladimir Lazareviq ka mohuar se është emëruar pedagog në Akademinë Ushtarake të Serbisë.

Për ‘Politico’ ai është arsyetuar duke thënë se ishte i ftuar në Akademi për të mbajtur një ligjëratë dhe për ta shfaqur përvojën në mbrojtjen e vendit.

Lazareviq ka shtuar se ai ka ligjëruar për heroizmat e trupave serbe kur kanë mbrojtur vendin nga agresioni i NATO-s gjatë operacioneve ‘anti-terroriste’ në Kosovë, në vitet 1998-1999, transmeton lajmi.net.

“Ka një pasqyrë të pasigurt si në vend dhe jashtë vendit, në deklaratat se unë jam emëruar një lektor. Jo, unë nuk jam emëruar, nuk jam nëpunës fisnik, as nuk kam marrë një angazhim nga politika aktuale. Jam ftuar nga udhëheqja e Akademisë Ushtarake për të përçuar përvojat e mia në mbrojtjen e vendit dhe me kënaqësi të madhe e kam pranuar këtë ftesë”, është shprehur Lazareviq.

Ai ka shtuar se për këtë, nuk është paguar e as nuk ka marrë ndonjë lloj shpërblimi.

Sipas tij, shumë ushtri janë interesuar në përvojën e Serbisë, dhe ai ka pyetur ‘pse ushtria serbe, akademikët dhe zyrtarët e tanishëm nuk duhet dëgjuar për këto përvoja’.

Ish-gjenerali nuk e din nëse përsëri do të mbajë ndonjë ligjëratë.

“Ndoshta do të më ftojnë përsëri, ndoshta edhe jo”, ka thënë ai.

“Isha një ushtar dhe mbeta vetëm një ushtar i cili mbrojti vendin e tij dhe gjithmonë do t’i shërbeja atij. Pasi u lirova dhe u ktheva në Serbi rreth dy vite më parë unë jam plotësisht i përkushtuar për familjen time dhe veten time. Nuk e di pse dikush duhet të shqetësohet për paraqitjen time publike”, ka përfunduar Lazareviq.

Deklaratat e kriminelit serb, kanë ardhur pas reagimit të Bashkimit Evropian se një ish i akuzuar për krime lufte nuk duhet të ligjëroj në Akademi Ushtarake.

Para kësaj, ministri i Mbrojtjes në Serbi, Aleksandar Vulin deklaroi se Lazareviq do të ligjërojë në Akademinë Ushtarake serbe si një pedagog i rregullt, madje këtë ai e tha duke u mburrur dhe thurrur lavde rreth tij./Lajmi.net/

Shpërndaje